|
  ბერლიპრილი® პლუსი 10/25, ტაბლეტები
BERLIPRIL PLUS ენალაპრილ მალეატი / ჰიდროქლოროთიაზიდი 1. პრეპარატ ბერლიპრილი® პლუსის აღწერა და გამოყენება ბერლიპრილი® პლუსი არის სამკურნალო საშუალება, რომელიც აქვეითებს არტერიულ წნევას (ჰიპოტენზიური პრეპარატი). ეს არის კომბინირებული პრეპარატი, რომელიც შედგება ანგიოტენზინგარდამქმნელი ფერმენტის (აგფ) ინჰიბიტორისა და შარდმდენი საშუალებისაგან (ჰიდროქლოროთიაზიდი). ბერლიპრილი® პლუსი გამოიყენება არტერიული წნევის ენალაპრილის ფონზე არასაკმარისად დაქვეითებისას ან ენალაპრილისა და ჰიდროქლოროთიაზიდის ერთდროული მიღების ნაცვლად, რომლებიც დანიშნული იყო კომბინირებული პრეპარატის ანალოგიური დოზებით. 2. პრეპარატ ბერლიპრილი® პლუსის მიღებამდე ბერლიპრილი® პლუსი უკუნაჩვენებია შემდეგ შემთხვევებში: • ალერგია (მომატებული მგრძნობელობა) მოქმედი ნივთიერების ენალაპრილის, სხვა აგფ ინჰიბიტორების ან პრეპარატის რომელიმე კომპონენტის მიმართ (იხ. პარაგრაფი 6 ~პრეპარატ ბერლიპრილი® პლუსის შემადგენლობა~); • ალერგია (მომატებული მგრძნობელობა) მოქმედი ნივთიერების ჰიდროქლოროთიაზიდის ან სხვა სულფონამიდების მიმართ; • შეშუპება აგფ ინჰიბიტორების მიღებისას (ანგიონევროზული შეშუპება); • ქსოვილების თანდაყოლილი მიდრეკილება შეშუპებისადმი ან გაურკვეველი მიზეზით გამოწვეული შეშუპება (მემკვიდრეობითი ან თანდაყოლილი ანგიონევროზული შეშუპება); • თირკმელების ფუნქციის მძიმე დარღვევისას (კრეატინინის კლირენსი 30 მლ/წთ ნაკლები) და/ან დიალიზის ჩატარებისას; • ღვიძლის ფუნქციის მძიმე დარღვევისას; • ორსულობის მეორე და მესამე ტრიმესტრი; • ძუძუთი კვების პერიოდი. ბერლიპრილი® პლუსი სიფრთხილით უნდა იქნას გამოყენებული შემდეგ შემთხვევებში: - არტერიული წნევის ზედმეტად დაქვეითების მომატებული რისკი წყლისა და ელექტროლიტური ცვლის დარღვევის და/ან სითხის დაკარგვის ფონზე, მაგალითად, შარდმდენი საშუალებების მიღების შემდეგ, მარილის შეზღუდვით დიეტის დაცვისას, ღებინების ან დიარეის დროს; - გულის მარცხენა პარკუჭის სარქველის სანათურის შევიწროება ან მარცხენა პარკუჭიდან სისხლის გამოდინების შემაფერხებელი სხვა დარღვევა; - გულის დაავადებები კორონარული არტერიების სისხლის მიმოქცევის დარღვევით (გულის იშემიური დაავადება); - თავის ტვინის სისხლძარღვებში სისხლის მიმოქცევის დარღვევა (თავის ტვინის სისხლის მიმოქცევის მოშლა); - თირკმლის ფუნქციის საშუალო სიმძიმის დარღვევა (კრეატინინის კლირენსი 30-80 მლ/წთ); - თირკმლის არტერიების შევიწროვება (ორმხრივი ან ცალმხრივი ერთი თირკმლის ფუნქციონირების შემთხვევაში); - თირკმლის ტრანსპლანტაცია ჩატარებული ახლო წარსულში; - ღვიძლის ფერმენტების დონის მომატება ან სიყვითლის გამოვლენა; - სისხლში ლეიკოციტების დონის შემცირება (ლეიკოპენია) ან ინფექციებისაგან დამცავი უჯრედების რაოდენობის გამოხატული დაქვეითება თანმხლები სიმპტომების გამოვლენით (აგრანულოციტოზი); - შემაერთებელი ქსოვილის ზოგიერთი დაავადება (კოლაგენოზები), რომელიც სისხლძარღვების დაზიანებით მიმდინარეობს; - იმუნური სისტემის დამთრგუნველი პრეპარატებით მკურნალობა; - ალოპურინოლით (პოდაგრის საწინააღმდეგო პრეპარატი), პროკაინამიდით (არითმიების საწინააღმდეგო პრეპარატი) ან ლითიუმის პრეპარატებით (დეპრესიის ზოგიერთი სახეობის საწინააღმდეგო პრეპარატი) მკურნალობა; - მომატებული მგრძნობელობის რეაქციები (ალერგია) ან ქსოვილების შეშუპება (ანგიონევროზული შეშუპება) ბერლიპრილი® პლუსით მკურნალობისას. - შაქრიანი დიაბეტი; - პოდაგრა; - შეუპოვარი მშრალი ხველა; - სისხლში კალიუმის კონცენტრაციის გაზრდის მომატებული რისკი; - არტერიული წნევის არასაკმარისად დაქვეითება ეთნიკური კუთვნილების გამო (განსაკუთრებით შავკანიან პაციენტებში). ისეთი სიმპტომები, როგორიცაა სიმშრალე პირის ღრუში, წყურვილი, სისუსტე, ლეთარგია, კუნთების ტკივილი ან კუნთების სპაზმი, გახშირებული გულისცემა, თავბრუსხვევა, გულისრევა, ღებინება და შარდის გამოყოფის შემცირება, შეიძლება იყოს წყლის ან ელექტროლიტური ბალანსის დარღვევის ნიშნები. მათი გამოვლენის შემთხვევაში დაუყოვნებლივ მიმართეთ ექიმს. მწერების შხამის (მაგალითად, ფუტკრის და კრაზანის) წინააღმდეგ მიმართული მადესენსიბილიზებელი თერაპიის ჩატარების საჭიროების შემთხვევაში, ბერლიპრილი® პლუსი დროებით უნდა ჩანაცვლდეს სათანადო პრეპარატით სხვა ჯგუფის სამკურნალო საშუალებებდან. წინააღმდეგ შემთხვევაში შეიძლება გამოვლინდეს მძიმე, სიცოცხლისათვის სახიფათო ჰიპერმგრძნობელობის რეაქციები (მაგალითად, არტერიული წნევის დაქვეითება, ქოშინი, ღებინება, კანის ალერგიული რეაქციები). აღნიშნულ რეაქციებს აგრეთვე შეიძლება ადგილი ჰქონდეს მწერების კბენის შემთხვევაში (მაგალითად, ფუტკრის და კრაზანის). გარკვეული ტიპის მემბრანების (გამტარობის მაღალი უნარით) გამოყენებით დიალიზის ან სისხლში ლიპიდების კონცენტრაციის შესამცირებლად ჩატარებულ მკურნალობასთან (დსლპ-აფერეზი დექსტრანსულფატით აბსორბციით) ერთად ბერლიპრილი® პლუსის მიღებისას შეიძლება გამოვლინდეს მომატებული მგრძნობელობის მძიმე რეაქციები სიცოცხლისთვის სახიფათო შოკურ მდგომარეობამდე. დიალიზის, ჰემოფილტრაციის ან დსლპ-აფერეზის ჩატარებამდე ექიმმა უნდა დაგინიშნოთ სხვა შესაბამისი პრეპარატი (მაგრამ არა აგფ ინჰიბიტორი) ან გამოიყენოს დიალიზის სხვა მემბრანება. თუ იღებთ ბერლიპრილი® პლუსს ან გჭირდებათ დიალიზის ჩატარება, აცნობეთ თქვენს ექიმს, რათა მან გაითვალისწინოს აღნიშნული გარემოება მკურნალობის დანიშვნისას. თუ ოპერაცია ან ნარკოზი გიწევთ (მათ შორის სტომატოლოგთან ვიზიტი) აცნობეთ თქვენს ექიმს, რომ იღებთ ბერლიპრილი® პლუსს, რადგან ნარკოზის დროს შეიძლება ადგილი ჰქონდეს არტერიული წნევის უეცარ დაქვეითებას. დაუყოვნებლივ მიმართეთ ექიმს შემდეგი სიმპტომების გამოვლენისას: - სახის, კიდურების, ტუჩების, ლორწოვანი გარსების, ენისა და/ან ხორხის შეშუპება, ქოშინი; - კანისა და ლორწოვანი გარსების გაყვითლება; - სხეულის ტემპერატურის მომატება, ლიმფური კვანძების გადიდება და/ან ხახის ანთება. ასეთ შემთხვევაში უნდა შეწყდეს ბერლიპრილი® პლუსით მკურნალობა და დაცული იქნას ექიმის რეკომენდაციები მკურნალობას შესახებ. ბერლიპრილი® პლუსით მკურნალობის დროს საჭიროა რეგულარული ვიზიტები ექიმთან. ექიმის მიერ დანიშნული გამოკვლევები და ანალიზები უნდა ჩატარდეს მაშინვე, გადაუდებლად. ჰიდროქლოროთიაზიდი, რომელიც შედის პრეპარატის შემადგენლობაში, შეიძლება იყოს დოპინგური ტესტის ცრუ-დადებითი პასუხის მიზეზი. ბერლიპრილი® პლუსის ლითიუმის პრეპარატებთან (გამოიყენება ფსიქიკური დაავადებების სამკურნალოდ) კომბინაციაში გამოყენება რეკომენდებული არ არის. ორსულობის, ორსულობაზე ეჭვის ან ორსულობის დაგეგმვის შემთხვევაში აუცილებლად აცნობეთ ექიმს. ბერლიპრილი® პლუსის მიღება ორსულობის პირველ ტრიმესტრში არ შეიძლება (იხ. პარაგრაფი ~ორსულობა და ლაქტაცია~). • პაციენტები თირკმელების ფუნქციის დარღვევით თირკმელების ფუნქციის დარღვევის მქონე პაციენტებისთვის პრეპარატის დოზა შეირჩევა ინდივიდუალურად. • ხანდაზმული პაციენტები არ არსებობს მონაცემები პაციენტის ასაკისა და პრეპარატის ეფექტურობისა და უსაფრთხოების ურთიერთკავშირის შესახებ. • ბავშვები და მოზარდები ბავშვებისათვის და მოზარდებისათვის ბერლიპრილი® პლუსის მიღება რეკომენდებული არ არის, რადგან მისი ეფექტურობა და უსაფრთხოება პაციენტების აღნიშნულ ჯგუფში არასაკმარისადაა შესწავლილი. სხვა სამკურნალო საშუალებების მიღება/გამოყენება აცნობეთ ექიმს ან ფარმაცევტს თუ იღებთ ან ახლო წარსულში იღებდით სხვა სამკურნალო საშუალებებს, ურეცეპტო სტატუსის მქონე პრეპარატების ჩათვლით. ბერლიპრილი® პლუსის სხვა პრეპარატებთან კომბინაციის შემთხვევაში შესაძლოა შემდეგი გვერდითი მოქმედებები: • შარდმდენი პრეპარატები , რომლებიც ამცირებს კალიუმის გამოყოფას (კალიუმის დამზოგველი დიურეზულები, მაგალითად, სპირონოლაქტონი, ტრიამტერენი ან ამილორიდი), კალიუმის შემცველი მარილის შემცვლელები, და ჰეპარინი: სისხლში კალიუმის კონცენტრაციის მომატება. მკურნალობის დროს ექიმმა რეგულარულად უნდა შეამოწმოს სისხლში კალიუმის კონცენტრაცია. • სხვა შარდმდენი საშუალებები (თიაზიდები ან მარყუჟოვანი დიურეზულები), არტერიული წნევის დამაქვეითებელი სხვა პრეპარატები, სისხლძარღვების გამაფართოვებელი პრეპარატები, დეპრესიის, ასევე სხვა ფსიქიკური დაავადებების სამკურნალო პრეპარატები (ტრიციკლური ანტიდეპრესანტები, ნეიროლეფსიურები), სანარკოზე საშუალებები, საანესთეზიოები: არტერიული წნევის მკვეთრი დაქვეითება. • ალკოჰოლი, ბარბიტურატები და სანარკოზე ანალგეზიურები: არტერიული წნევის ჭარბი დაქვეითება წამოდგომისას ვერტიკალურ მდგომარეობაში გადასვლის დროს. • ლითიუმის პრეპარატები (დეპრესიის ზოგიერთი სახეობის სამკურნალო პრეპარატი): ლითიუმით მოწამვლის მომატებული რისკი. ამიტომ, ბერლიპრილი® პლუსის და ლითიუმის პრეპარატების ერთდროულად მიღება რეკომენდებული არ არის. თუ აღნიშნული კომბინაციის გამოყენება აუცილებელია, მკურნალობის დროს საჭიროა სისხლში ლითიუმის შემცველობის რეგულარული კონტროლი. • ტკივილგამაყუჩებელი და ანთების საწინააღმდეგო პრეპარატები (ანთების საწინაარმდეგო არასტეროიდული საშუალებები): არტერიული წნევის არასაკმარისად დაქვეითება, სისხლში კალიუმის კონცენტრაციის მომატება და თირკმელების ფუნქციის გაუარესება; იშვიათ შემთხვევებში – თირკმელების მწვავე უკმარისობა, განსაკუთრებით თირკმელების ფუნქციის დარღვევის მქონე პაციენტებში. • იმუნური სისტემის დამთრგუნველი პრეპარატები (იმუნოდეპრესანტები), სისტემური კორტიკოსტეროიდები, პროკაინამიდი (არითმიის საწინააღმდეგო პრეპარატები): ლეიკოციტების კონცენტრაციის შემცირების მომატებული რისკი მთლიანობაში ან მათი ცალკეული ფრაქციის შემცირება (ლეიკოპენია). • ციტოსტატურები (მაგალითად, ციკლოფოსფამიდი, ფტორურაცილი, მეთოტრექსატი): ძვლის ტვინზე ტოქსიური მოქმედების გაძლიერება (კერძოდ, გრანულოციტოპენია). • პოდაგრის საწინააღმდეგო პრეპარატ ი (მაგალითად, ალოპურინოლი, ბენზბრომარონი): პოდაგრის სამკურნალოდ შეიძლება საჭირო გახდეს პრეპარატის დოზის გაზრდა. • სიმპათომიმეტურები (ბუნებრივი მედიატორების ნორეპინეფრინის ან ეპინეფრინის ეფექტების გამომწვევი საშუალებები, მაგალითად ჰიპოტენზიური ეფექტი) კოლესტირამინი და კოლესტიპოლი (სისხლში ლიპიდების კონცენტრაციის დამაქვეითებელი პრეპარატების მოქმედი ნივთიერებები): არტერიული წნევის არასაკმარისი დაქვეითება. • შაქრის დამწევი პრეპარატები და ინსულინი: შეიძლება საჭირო გახდეს შაქრის დამწევი პრეპარატების ან ინსულინის დოზის შეცვლა. • ამფოტერიცინი B (გამოიყენება სოკოვანი ინფექციების სამკურნალოდ) კარბენოქსოლონი (კუჭის/ნაწლავების წყლულოვანი დაავადების სამკურნალოდ), კორტიზონის შემცველი პრეპარატები (კორტიკოსტეროიდები), კორტიკოტროპინი (ჰორმონი, რომელიც ზეგავლენას ახდენს თირკმელზედა ჯირკვლის მოქმედებაზე) და გარკვეული საფაღარათო საშუალებები: ელექტროლიტური ცვლის დარღვევა, კერძოდ კალიუმის დონის დაქვეითება. • კალციუმის მარილები: სისხლში კალციუმის კონცენტრაციის მომატება. • საგულე გლიკოზიდები (მაგალითად, დიგოქსინი, რომელიც ზრდის გულის სისტოლურ მოცულობას): საგულე გლიკოზიდების ეფექტებისა და გვერდითი მოქმედებების გაძლიერება. • მიორელაქსანტები (მაგალითად, ტუბოკურარინის ქლორიდი, რომელიც ადამბლავებს კუნთებს): მიორელაქსანტების მოქმედების გაძლიერება და გახანგრძლივება. • პრეპარატები, რომლებიც იწვევს პარკუჭოვანი ტაქიარითმიის "torsades de pointes"-ის განვითარებას , გულის რიტმის სახიფათო დარღვევა (მაგალითად, ზოგიერთი არითმიის საწინააღმდეგო ან ფსიქოაქტიური პრეპარატები): პარკუჭოვანი ტაქიარითმიის "torsades de pointes"-ის განვითარების რისკი იზრდება სისხლში კალიუმის კონცენტრაციის შემცირებისას. პრეპარატი ბერლიპრილი® პლუსის საკვებთან და სასმელთან მიღება. • სუფრის მარილი: არტერიული წნევის არასაკმარისი დაქვეითება. • ალკოჰოლი: არტერიული წნევის ჭარბი დაქვეითება. ორსულობა და ლაქტაცია ნებისმიერი პრეპარატის მიღების წინ რჩევისთვის მიმართეთ ექიმს ან ფარმაცევტს. ბერლიპრილი® პლუსის მიღებამდე აცნობეთ თქვენს ექიმს თუ ორსულად ხართ, ეჭვი გაქვთ, რომ ხართ ორსულად, გეგმავთ ორსულობას ან ბავშვს ძუძუთი კვებავთ. • ორსულობა ბერლიპრილი® პლუსი რეკომენდებული არ არის ორსულობის პირველ ტრიმესტრში. არ შეიძლება ბერლიპრილი® პლუსის მიღება ორსულობის მეორე და მესამე ტრიმესტრში. ორსულობის დადგენის ან დაგეგმვის შემთხვევაში საჭიროა დაუყოვნებლივ მოიხსნას ბერლიპრილი® პლუსი და დაინიშნოს სხვა ჰიპოტენზიური პრეპარატი, რადგან მკურნალობის გაგრძელება დაკავშირებულია ნაყოფისთვის მაღალ რისკთან. • ლაქტაცია ბერლიპრილი® პლუსის მიღება ძუძუთი კვების პერიოდში არ შეიძლება, რადგან პრეპარატის მოქმედი ნივთიერებები – ენალაპრილი და ჰიდროქლოროთიაზიდი – გამოიყოფა დედის რძეში. ზემოქმედება სატრანსპორტო საშუალებების მართვის და მექანიზმებთან მუშაობის უნარზე ბერლიპრილი® პლუსმა შეიძლება შეცვალოს რეაქციის უნარი, ამიტომ საგზაო მოძრაობაში მონაწილეობა, მექანიზმების მართვა ან მუშაობა არამდგრადი წონასწორობის პირობებში შეიძლება დაკავშირებული იყოს გარკვეულ რისკთან. ეს განსაკუთრებით ხდება მკურნალობის დასაწყისში, დოზის გაზრდის და მედიკამენტის შეცვლისას, აგრეთვე მკურნალობის დროს ალკოჰოლური სასმელის გამოყენებისას. გაითვალისიწინეთ, რომ ბერლიპრილი® პლუსის მიღებას შეიძლება თან ახლდეს თავბრუსხვევა ან სისუსტე. მნიშვნელოვანი ინფორმაცია ბერლიპრილი® 5-ის ზოგიერთი კომპონენტების შესახებ აღნიშნული სამკურნალო საშუალება შეიცავს ლაქტოზას. ამიტომ, შაქრის ზოგიერთი სახეობის მიმართ აუტანლობის შემთხვევაში, ბერლიპრილი® პლუსის მიღებამდე კონსულტაციისთვის მიმართეთ ექიმს ან ფარმაცევტს. 3. პრეპარატი ბერლიპრილი® პლუსის მიღების წესი. პრეპარატი ბერლიპრილი® პლუსი ყოველთვის მიიღება მკურნალი ექიმის დანიშნულებით. დამატებითი ინფორმაციის მისაღებად, მიმართეთ ექიმს ან ფარმაცევტს. შესაძლებელია, კომბინირებული პრეპარატის დანიშვნამდე ექიმმა მიიღოს გადაწყვეტილება აქტიური კომპონენტების (ენალაპრილისა და ჰიდროქლოროთიაზიდის) დოზის ცალ-ცალკე შერჩევის შესახებ. შემდეგ, აუცილებლობის შემთხვევაში, ექიმი გადაგიყვანთ ბერლიპრილი® პლუსით მკურნალობაზე. ქვემოთ ნაჩვენებია პრეპარატის ჩვეულებრივი დოზა, თუ ექიმის მიერ სხვაგვარად არ არის დანიშნული. 1 ტაბლეტი ბერლიპრილი® პლუსი ერთხელ დღე-ღამეში. მითითება: ორი პრეპარატის მიღებიდან ბერლიპრილი® პლუსის მიღებაზე გადასვლისას შესაძლებელია მოხდეს არტერიული წნევის ჭარბი დაქვეითება. ხშირად ეს აღინიშნება წყალ-მარილოვანი ბალანსის დარღვევის მქონე პაციენტებში (მაგალითად, ღებინების, დიარეის, შარდმდენი საშუალებების მიღების შემდეგ), ასევე გულის მძიმე უკმარისობის ან მაღალი არტერიული წნევის დროს, რაც დაკავშირებულია თირკმელების მძიმე სიმპტომებთან ან დაავადებებთან. ამიტომ, ბერლიპრილი® პლუსის პირველი ტაბლეტის მიღების შემდეგ თქვენ შესაძლოა, დარჩეთ ექიმის კონტროლის ქვეშ 8 საათის განმავლობაში • მიღების წესი: ბერლიპრილი® პლუსის მიღება შეიძლება კვებისგან დამოუკიდებლად. დანიშნული სადღეღამისო დოზა მიიღება დილით, საკმარისი რაოდენობის სითხესთან ერთად, (მაგალითად, ჭიქა წყალი). გამყოფი ხაზი გამიზნულია ტაბლეტის გასაყოფად ყლაპვის გასაადვილებლად და არა ტაბლეტის თანაბარ დოზებად გასაყოფად. • მიღების ხანგრძლივობა მკურნალობის ხანგრძლივობას განსაზღვრავს ექიმი. თუ ფიქრობთ, რომ პრეპარატი ბერლიპრილი® პლუსის მოქმედება ძალიან ძლიერი ან სუსტია, მიმართეთ მკურნალ ექიმს ან ფარმაცევტს. ბერლიპრილი® პლუსის დოზის გადაჭარბების შემთხვევაში პრეპარატის დოზის შემთხვევით გადაჭარბებისას, დაუყოვნებლივ მიმართეთ ექიმს ან დაუკავშირდით სასწრაფო დახმარების ექიმს. მოწამვლის სიმძიმის მიხედვით ექიმი მიიღებს სათანადო ზომებს. დოზის გადაჭარბების ხარისხის შესაბამისად შესაძლებელია შემდეგი სიმპტომების გამოვლენა: ხშირი და უხვი შარდვა, ელექტროლიტური ბალანსის დარღვევა, არტერიული წნევის მნიშვნელოვანი დაცემა, გონების დაბინდვა ან დაკარგვა, კრუნჩხვები, მსუბუქი ხარისხის დამბლა, გულის რიტმის დარღვევა, პულსის შენელება ან გახშირება, სისხლძარღვოვანი უკმარისობა, თირკმელების უკმარისობა. დოზის გადაჭარბებაზე ეჭვის შემთხვევაში დაუყოვნებლივ მიმართეთ ექიმს. პრეპარატი ბერლიპრილი® პლუსის დოზის გამოტოვება გამოტოვებული დოზის კომპენსაციის მიზნით პრეპარატის ორმაგი დოზით მიღება არ შეიძლება. პრეპარატი ბერლიპრილი® პლუსის მიღების შეწყვეტა არ შეწყვიტოთ ბერლიპრილი® პლუსით მკურნალობა მკურნალ ექიმთან წინასწარი კონსულტაციის გარეშე! მკურნალობასთან დაკავშირებულ ნებისმიერ საკითხზე რჩევისათვის მიმართეთ ექიმს ან ფარმაცევტს. 4. შესაძლო გვერდითი მოქმედებები. როგორც ყველა სხვა სამკურნალო საშუალებას, ბერლიპრილი® პლუსსაც შეიძლება ჰქონდეს გვერდითი მოქმედებები, თუმცა ის არ ვლინდება ყველა პაციენტში. იმ შემთხვევაში, თუ რომელიმე გვერდითი მოვლენა გაგირთულდათ, ან შენიშნავთ ისეთ გვერდით მოქმედებას, რომელიც არ არის აღნიშნული წინამდებარე ჩანართში, შეატყობინეთ მკურნალ ექიმს ან ფარმაცევტს. გვერდითი მოქმედებები ან სიმპტომები, რომლებიც საჭიროებს ყურადღებას, და ამასთან დაკავშირებული სიფრთხილის ზომები. ხორხის, სახმო იოგების და/ან ენის ქსოვილების შეშუპების დროს (ანგიონევროზული შეშუპება), დაუყოვნებლივ მიმართეთ მკურნალ ექიმს, რომელიც მიიღებს სიფრთხილის ზომებს. სიყვითლის ნიშნების გამოვლენის შემთხვევაში შეწყვიტეთ პრეპარატის მიღება და მიმართეთ ექიმს. სხეულის ტემპერატურის მომატებისას, ლიმფური კვანძების გადიდების და/ან ყელის ანთების შემთხვევაში საჭიროა აგრეთვე ექიმთან მიმართვა, რომელიც დანიშნავს სისხლის ანალიზს და შეამოწმებს ლეიკოციტების დონეს. ბერლიპრილი® პლუსით მკურნალობის ფონზე ზემოთ აღწერილი ნებისმიერი მოვლენის შემთხვევაში დაუყოვნებლივ აცნობეთ ექიმს. სხვა შესაძლო გვერდითი მოქმედება გვერდითი მოქმედებების შეფასებას საფუძვლად უდევს მათი გამოვლენის სიხშირის შემდეგი მონაცემები: ძალიან ხშირად: 10 ნამკურნალევი პაციენტიდან 1-ზე მეტს ხშირად: 10 ნამკურნალევი პაციენტიდან 1-ზე ნაკლებს და 100 პაციენტიდან 1-ზე მეტს ზოგჯერ: 100 ნამკურნალევი პაციენტიდან 1-ზე ნაკლებს და 1000 პაციენტიდან 1-ზე მეტს იშვიათად: 1000 ნამკურნალევი პაციენტიდან 1-ზე ნაკლებს და 10000 პაციენტიდან 1-ზე მეტს ძალიან იშვიათად: 10 000 ნამკურნალევი პაციენტიდან 1-ზე ნაკლებს, ან შემთხვევები არ არის აღწერილი. • ინფექციები : იშვიათად: სანერწყვე ჯირკვლების ანთება. • დარღვევები სისხლის წარმოქმნისა და ლიმფური სისტემას მხრივ ზოგჯერ: ანემია ერითროციტების გაძლიერებული დაშლის (ჰემოლიზური ანემია) ან ძვლის ტვინში სისხლის წარმოქმნის დარღვევის ფონზე (აპლასტური ანემია). იშვიათად: სისხლის ზოგიერთი უჯრედების კონცენტრაციის შემცირება (ლეიკოპენია, ნეიტროპენია, თრომბოციტოპენია, პანციტოპენია) გარკვეული სახის ლეიკოციტების რაოდენობის გამოხატულ შემცირებამდე (აგრანულოციტოზი), ზოგიერთი ლაბორატორიული პარამეტრის დაქვეითება (ჰემოგლობინი და ჰემატოკრიტი), ძვლის ტვინის ფუნქციის დარღვევა (ძვლის ტვინის ფუნქციის დათრგუნვა), ლიმფური კვანძების გადიდება, აუტოიმუნური დაავადებები. • კვებისა და ნივთიერებათა ცვლის დარღვევა ძალიან ხშიარად: სისხლში გლუკოზის კონცენტრაციის მომატება, შარდში გლუკოზის გამოვლენა, სისხლში შარდმჟავას კონცენტრაციის მომატება, ელექტროლიტური ცვლის დარღვევა (ნატრიუმის დეფიციტი, კალიუმის დეფიციტი), სისხლში ლიპიდების (ქოლესტერინისა და ტრიგლიცერიდების) დონის მომატება. ზოგჯერ: სისხლში გლუკოზის კონცენტრაციის დაქვეითება. ძალიან იშვიათად: სისხლის პH მომატება. • ფსიქიკური დარღვევები: ხშირად: დეპრესია. იშვიათად: მოუსვენრობა. • ნერვულის სისტემა: ხშირად: გულის წასვლის შეგრძნება, თავის ტკივილი ზოგჯერ: ცნობიერების მოშლა, ძილიანობა, უძილობა, გაღიზიანებადობა, უჩვეულო შეგრძნებები კანის მხრივ (მაგალითად, ჩხვლეტა, წვა), ძლიერი თავბრუსხვევა. იშვიათად: უჩვეულო სიზმრები, ძილის დარღვევა. • მხედველობის ორგანოები ძალიან ხშირად: არამკვეთრი მხედველობა. ზოგჯერ: გარემოს აღქმა ყვითელ ფერში, მხედველობა გარდამავალი დაბინდვა. • სმენის ორგანოები: ზოგჯერ: ხმაური ყურებში (ტინნიტუსი). • გული : ხშირად: ტკივილი გულ-მკერდის არეში, გულის რიტმის დარღვევა, მოჭერითი ხასიათის ტკივილი მკერდის ძვლის უკან (სტენოკარდია), გახშირებული პულსი, გახშირებული გულისცემა. • სისხლძარღვები : ძალიან ხშირად: თავბრუსხვევა. ხშირად: არტერიული წნევის ჭარბი დაქვეითება, მაგალითად ადგომისას, გონების ხანმოკლე დაკარგვა (გულის წასვლა), გულის შეტევა ან ინსულტი, შესაძლოა გულის კუნთში და/ან თავის ტვინში სისხლის მიმოქცევის დარღვევის მქონე პაციენტებში წნევის გამოხატული დაქვეითების შედეგად. იშვიათად: ხელის მტევნებში და ტერფებში სიხლის მიმოქცევის მოშლა, რომელიც გამოწვეულია სისხლძარღვთა სპაზმით (რეინოს სინდრომი), წვრილი სისხლძარღვების ანთება. • სუნთქვის ორგანოები : ძალიან ხშირად: ხველა. ხშირად: ქოშინი (მათ შორის პნევმონიისა და ფილტვებში სითხის დაგროვებისას). ზოგჯერ: სურდო, ტკივილი ყელის არეში და ხმის ჩახლეჩვა, ბრონქების სპაზმი, ასთმა. იშვიათად: ცვლილებები ფილტვების ქსოვილში (ინფილტრატები), სინუსიტი, ალერგიული ხასიათის ანთებითი პროცესები ფილტვებში. • კუჭ-ნაწლავის ტრაქტი : ძალიან ხშირად: გულისრევა. ხშირად: დიარეა, შეკრულობა, ტკივილი კუჭის არეში, გემოს აღქმის შეცვლა, კუჭის გაღიზიანება, კუჭქვეშა ჯირკვლის ანთება. ზოგჯერ: ნაწლავური გაუვალობა, ღებინება, საჭმლის მონელების პროცესის დარღვევა, მადის დაკარგვა, პირის სიმშრალე, კუჭის წყლული. იშვიათად: პირის ღრუს ლორწოვანი გარსის წყლულოვანი ანთება, ენის ლორწოვანი გარსის ანთება. ძალიან იშვიათად: ნაწლავების ქსოვილის შეშუპება (ანგიონევროზული შეშუპების ნაწლავური ფორმა). • ღვიძლი და ნაღვლის გამომყოფი გზები: ზოგჯერ: სიყვითლე. იშვიათად: ღვიძლის უკმარისობა, ჰეპატიტი (ღვიძლის უჯრედების ნეკროზამდე). • კანი : ხშირად: გამონაყარი, ქსოვილების მომატებული მგრძნობელობის/შეშუპების რეაქციები (ანგიონევროზული შეშუპება).აღწერილია ანგიონევროზული შეშუპების შემთხვევები სახის, კიდურების, ტუჩების, ენის, სახმო იოგების და/ან ხორხის დაზიანებით. ზოგჯერ: გაძლიერებული ოფლდენა, ქავილი, ჭინჭრის ციება, თმის ცვენა, კანის მზის სხივების მიმართ მომატებული მგრძნობელობა, გამონაყარი. იშვიათად: სერიოზული რეაქციები კანის მხრივ (პოლიმორფული ერითემა, სტივენს-ჯონსონის სინდრომი, ექსფოლიატური დერმატიტი, ტოქსიური ეპიდერმული ნეკროლიზი, პემფიგუსი, ერითროდერმია), სისტემური წითელი მგლურას მსგავსი კანის რეაქციები (კანის დაზიანებით მიმდინარე აუტოიმუნური დაავადება), სისტემური წითელი მგლურას კანის ფორმის რეციდივი, მომატებული მგრძნობელობის მძიმე რეაქციები. აღწერილია სიმპტომოკომპლექსი, რომელიც შეიძლება მოიცავდეს შემდეგ გვერდით მოვლენებს:, სხეულის ტემპერატურის მომატება, სეროზული გარსების ანთება (მაგალითად, პლევრის), სისხლძარღვების ანთება, კუნთების ტკივილი ან ანთება, სახსრების ტკივილი და სახსრების ანთება და ლაბორატორიული მაჩვენებლების ზოგიერთი გადახრა (სისხლში ანტიბირთვული ანტისხეულების დადებითი ტიტრი, ერითროციტების დალექვის სიჩქარის მომატება, ეოზინოფილია და ლეიკოციტოზი). ასევე, შეიძლება ადგილი ჰქონდეს კანზე გამონაყარს, მზის სხივების მიმართ მგრძნობელობის მომატებას და სხვა რეაქციებს კანის მხრივ. • საყრდენ-მამოძრავებელი აპარატი ზოგჯერ: კუნთების კრუნჩხვა. • თირკმელები და შარდგამომყოფი გზები : ზოგჯერ: თირკმელების ფუნქციის დარღვევა, თირკმელების უკმარისობა, ცილების გამოყოფა შარდთან ერთად, თირკმელების მწვავე ანთება. იშვიათად: გამოყოფილი შარდის მოცულობის შემცირება. • სასქესო სისტემა და სარძევე ჯირკვლები ზოგჯერ: იმპოტენცია. იშვიათად: სარძევე ჯირკვლის გადიდება მამაკაცებში. • სისტემური დარღვევები ძალიან ხშირად: სისუსტე. ხშირად: მომატებული დაღლილობა. ზოგჯერ: სახის გაწითლება (წამოხურება), ზოგადი სისუსტე, სხეულის ტემპერატურის მომატება, • ლაბორატორიული მაჩვენებლები ხშირად: სისხლში კალიუმის, შარდოვანას, შარდმჟავას და/ან კრეატინინის კონცენტრაციის მომატება. ზოგჯერ: სისხლში ნატრიუმის კონცენტრაციის შემცირება. იშვიათად: ღვიძლის მაჩვენებლების (ღვიძლის ფერმენტების აქტიურობის, შრატში ბილირუბინის კონცენტრაციის) მომატება. 5. პრეპარატი ბერლიპრილი® პლუსის შენახვის პირობები სამკურნალო საშუალება ინახება ბავშვებისათვის მიუწვდომელ ადგილას. 3 წელი. პრეპარატი არ გამოიყენება ვარგისიანობის ვადის გასვლის შემდეგ, რომელიც მითითებულია მუყაოს კოლოფზე და ბლისტერზე. ვარგისიანობის ვადის გასვლის თარიღი გულისხმობს მითითებული თვის ბოლო დღეს. სამკურნალო საშუალებების კანალიზაციის მილში ან ნაგავთან გადაგდება არ შეიძლება. პრეპარატის უტილიზაციის საკითხთან დაკავშირებით მიმართეთ ფარმაცევტს. აღნიშნული ზომები ხელს შეუწყობს გარემოს დაცვას. შენახვის პირობები პრეპარატი ინახება არა უმეტეს 30 ˚C ტემპერატურაზე. ტენისაგან დაცულ ადგილას და ორიგინალურ შეფუთვაში. 6. დამატებითი ინფორმაცია პრეპარატი ბერლიპრილი® პლუსის შემადგენლობა პრეპარატის მოქმედ ნივთიერებებს წარმოადგენს ენალაპრილ მალეატი და ჰიდროქლოროთიაზიდი. ყოველი ტაბლეტი შეიცავს 10მგ ენალაპრილ მალეატს და 25მგ ჰიდროქლოროთიაზიდს. დამხმარე კომპონენტები: ლაქტოზის მონოჰიდრატი, მაგნიუმის კარბონატი ძირითადი, მსუბუქი, ჟელატინი, კარბოქსიმეთილსახამებლის ნატრიუმის მარილი (ტიპი A), სილიციუმის დიოქსიდი კოლოიდური უწყლო, მაგნიუმის სტეარატი, რკინის ოქსიდის ყვითელი ჰიდრატი (E172). პრეპარატი ბერლიპრილი® პლუსის აღწერა და შეფუთვა ღია-ყვითელი ბრტყელი ტაბლეტები პარალელური ზედაპირებით, ჩამოჭრილი კიდეებით და გამყოფი ზოლით ერთ მხარეს. შეფუთვში მოთავსებულია ბერლიპრილი® პლუსის 30, 50 და 100 ტაბლეტი. შეიძლება ბაზარზე ყველა სახის შეფუთვა არ იყოს წარმოდგენილი. აფთიაქიდან გაცემის პირობა ფარმაცევტული პროდუქტის ჯგუფი II (გაცემის რეჟიმი: რეცეპტით). რეგისტრაციის მფლობელი და მწარმოებელი ბერლინ-ხემი აგ (მენარინი გრუპ) გლინიკერ ვეგ 125, 12489 ბერლინი, გერმანია ჩანართის ბოლო რედაქტირების თარიღი: 10/2008 ანოტაციის მომწოდებელია:   |
|
| გეომაგნიტურობა |
| 2012 (c) tsamali.ge ყველა უფლება დაცულია |
|
დაგვიკავშირდით |
გაფრთხილება!!!
საიტზე არსებული ინფორმაცია არ არის თვითმკურნალობის საფუძველი! ნებისმიერი სამკურნალო საშუალების გამოყენებამდე სასურველია გაიაროთ კონსულტაცია ექიმთან. საიტის ადმინისტრაცია არანაირ პასუხისმგებლობას არ იღებს თქვენს მიერ სამკურნალო საშუალებების გამოყენებაზე.